Headlines News :
Home » , » Ezekusaun OGE 2014 Foin Atinji 28% Sosiedade Sivil Krítika Membru Governu

Ezekusaun OGE 2014 Foin Atinji 28% Sosiedade Sivil Krítika Membru Governu

Written By Timor News Online on 5/29/2014 | 10:35 PM



Ezekusaun Orsamentu Jeral do Estado 2014 foin atinji pursentu 28 (US$269,772,247.11) husi montante orsamentu orijinál US$1,500,000,254.00 , nune’e sosiedade sivil haree katak, laiha balansu entre ezekusaun ho planu no programas, tanba membru Governu laiha kapasidade atu jere orsamentu.
Tuir dadus husi Ministeriu Finansa (MF) ne’ebé publika liu husi www.transparency.gov.tl hatudu katak, ministériu balun nia ezekusaun orsamentu sei ki’ik maske atu tama ona ba fulan nen.
Tuir lei orsamentu, fulan tolu tenki to’o ona 25% no ba fulan nen tenki to’o 50%, maibé realidade Ministériu no Sekretariu Estado balun sei minimu, balun mak liu ona hanesan Ministériu Petroleum no Rekursu Minerais (MPRM) to’o ona 86.8% ($10,258,361.9) husi orsamentu inisial US$11,900,000.00, Comissão Nacional Eleisaun (CNE) to’o ona 55.64% ($388,791.78) husi orsamentu inisial US$8,972,290.00 no ikus mak Secretario de Estado do Fortalecimento Institucional (SEFI) to’o ona 54.16% ($559,866.92) husi orsamentu inisial $1,978,000.
Sira ne’ebé ezekusaun ki’ik liu mak Ministro de Estado da Presidência do Conselho dos Ministros (MPCM) foin to’o 6.38% ($1,380,198.06) husi orsamentu $27,193,000, Secretario Estado do Conselho de Ministros (SECM) foin to’o 6.55% ($208,011.12) husi orsamentu inisial $3,943,500, Secretario Estado Juventude e Desporto foin to’o 14.33% ($861,135.76) husi orsamentu inisial $8,459,300, Ministério do Comércio, Indústria e do Ambiente (MCIA) foin to’o 15.13% ($2,456,066.49) husi orsamentu inisial $21,355,000, Ministério dos Transportes e Comunicações foin to’o 15.76% ($1,851,303.03) husi orsamentu inisial $19,265,972, Ministeriu Justisa (MJ) foin to’o 17.84% ($2,767,137.34) husi orsamentu inisial $21,340,000 no ikus Secretaria de Estado para a Politica da Formação Profissional e Emprego (SEFOPE) foin to’o 19.21% ($1,634,583.67) husi orsamentu inisial $15,322,170
Tantu Ministeriu no Sekretariu Estado ne’ebé nia ezekusaun foin to’o 20% to’o 45% mak Presidente da República (PR), Parlamento Nacional (PN), Primeiro-Ministro (PM), Vice Primeiro-Ministro, Coordenador dos Assuntos Sociais (V-PM), Secretaria de Estado Assuntos Parlamentares (SEAP), Secretaria de Estado da Comunicação Social (SEComs), Secretaria de Estado para o Apoio e Promoção do Sector Privado (SEAPRI), Secretario Estado Promoção da Igualdade (SEPI), Ministério dos Negócios Estrangeiros e Cooperação (MNEC), Ministério da Defesa Seguransa (MDS), Ministério da Finanças (MF), Dotações para todo o Governo, Ministério da Saúde (MS), Ministério da Educação (ME), Ministério da Administração Estatal (MAET), Ministerio da Solidariedade Social (MSS), Ministério das Obras Públicas (MOP), Ministerio da Agricultura Pescas (MAP), Ministério do Turismo (MT), Tribunais, Procuradoria Geral da Repúblic (PGR), Provedoria de Direitos Humanos no Justisa (PDHJ) Radio,Televisao de Timor-Leste (RTTL), Comissão Anti Corrupsaun (CAC), Comissão Funsaun Publica CFP), Universidade Nacional de Timor Lorosa’e (UNTL), Commissão de Administracão do Fundo Infraestrutura – FI no ikus Commissão de Administracão do Fundo Desenvolvimento Capital Humano – FDCH.
Ho rejultadu ezekusaun ne’e, Organizasaun Naun Govermental Luta Hamutuk konsidera ezekusaun ne’e ses ona husi estandar ezekusaun, sigifika esjekusau faila.
Tuir Diretur Luta Hamutuk, Mericio Akarak katak, tinan ba tinan membru Governu sira repete hela deit erru no frakeza ne’ebé sira iha antirior, sira nunka atu estuda husi erru refere.
“Kapasidade jestor hahu husi Ministru, Sekretariu Estadu to’o nia Diretur sira hanesan deit, ladun hatene tau skala perioridade, lahatene jere no oinsa halo mobilizasaun iha nivel kraik,” dehan Mericio Akara ba JN-Diario Kinta (29/5) iha nia kna’ar fatin.
Nia hatutan, kapasidade atu lidera institusaun ne’e mak fraku, halo serimonia bar-barak maibe lahatene atu hahu husi ne’ebé, hanesan fulan tolu mai ejekuta saida tuir tan mai saida tan, ida ne’e mak problema.
“Hau bele dehan kapasidade jestor mak laiha, osan mak husu bo’ot maibe oinsa atu jere. Kuandu ita jere ona tenki hlo fali relatoriu Ministeriu Finansa para nia bele cairkan osan, maibe ita nia membru Governu lahalo ida ne’e, sira dun no fo sala ba malu deit,” esplika nia.
Ba Luta Hamutuk nia hare, tuir lolos kria linha koordenasaun ne’ebé diak atu bele fasilita malu, nune’e bainhira seluk implimenta programa halo kedas relatoriu no ida seluk aprova osan, tanba dala barak sira fo sala ba sistema MF nian.
Tempu ba ezekusaun ne’e hela fulan haat deit, imajina agora mak nune’e kala ba oin ne’e sira kria projeitu lalais para fahe osan refere.
Nune’e mos Diretur Asosiasaun Hak, Manuel Monteiro Fernandes hatete, ho orsamentu ne’ebé aprova ne’e seidauk koresponde ba nesesidade povu, povu barak mak sei lakon sira nia direitu atu asesu ba nesesidade bazika.
“Ita hare dezenvolvimentu agora ne’e taka tiha sobu fali, povu han rai rahun to’o baruk. Nune’e mos rezultadu ezekusaun orsamentu ne’e mos la fo benefisiu ba povu sira ne’ebé hela iha area rural,” dehan Manuel.
Tantu orsamentu ne’ebé Governu uza hodi responde ba nesesidade nasaun hahu husi tinan 2003-2004 mak $80,316,078.20, 2004-2005 $86,962,000.00, 2005-2006 iha $142,188,000.00, 2006-2007 $328,579,000.00 no iha 2007 tranzisaun $116,409,000.00 no ba iha 2008 gasta osan hamutuk $788,312.000.00, 2009 hamutuk $680,873,000.00, iha 2010 $837,981,072.00. Maibe iha 2011 orsamentu sae makas ba $1,647,519,204.00, tinan 2012 sae tan ba $1,806,449,826.00, iha tinan 2013 tun fali ba $1,647,519,204.00 no iha tinan 2014 iha $1,500,000,254.00.
Maske tinan-tinan Governu kria planu no programa furak no propoin orsamentu barak iha OGE atu koresponde ba programa hirak ne’e atu dezenvolvimentu no hadia povu nia moris, maibe realidade iha area rural sei nafatin halerik ba estrada, bee mos, eletrisidade, laiha sustentabilidade ekonomia, estandar moris povu sei minim no mal nutrisaun sei aas.
Iha parte seluk, Vice Prezidenti Parlamento Nacional, Aderito Hugo da Costa hatete, ezekusaun Osamentu Jeral Estadu 2014 ne’ebé kada Ministerial sira ezekuta ne’e kestaun laos kapasidade ezekusaun, maibe kestaun iha arogansia intutisional.
“Ho rezultadu ezekusaun ne’e hau husu iha fase elaborasaun osamentu tuir mai ne’e tenki mai ho boafee, labele mai deit ho arogansia intitusinal, labele mai deit ho ambisaun pesoal ida hakarak deit katak, ninia motante osamentu tenki bo’ot, para depois bele dehan katak Ministeiru ida ne’e osamentu bo’ot, mais narealidade implementasaun rungu ranga tun sae deit,” dehan Deputadu Aderito Hugo.
Tantu Deputadu Paulino Monteiro husi bankada PD hatete, Parlamentu Nacional hanoin pna atu halo redusaun ba sira nia orsamentu, tanba ezekusaun tinan ne’e minim tebes.
“Hau hare ezekusaun osamentu ne’e minim tebes, minim ne’e hatudu duni inkapasidade, Basa ladun prepara an atu ezekuta osamentu ne’e mak ninia impaktu ne’e ba prosesu ikus mai bele halo redusaun ba sira nia osamentu rasik, tanba ezekusaun lao ladun diak bele impede projeitu sira ne’ebé ita nia populasaun sira presiza atu hetan,”dehan Deputadu Paulino.nty
Source: JD Nasional
Share on :

0 Comentarius:

Speak up your mind

Tell us what you're thinking... !

SPONSOR

Hare'e Ami Nia Sponsor

Sponsor

Hare'e Ami Nia Sponsor

 
Support : Creating Website | Timor Free | Timor Free
Proudly powered by Blogger
Copyright © 2014. Opini Timor - All Rights Reserved
Template Design by Creating Website Published by Mas Template Download This Free Blogger Template